साधक साधना

मानव सुखालोलुप अंध ।
मनासी नाही निर्बंध ।
शतावधी आशांनी बद्ध ।
जखडला अगतिक ।।

मोह काम क्रोध ।
लोभ मत्सर मद ।
शिपाई हे हत्यारबंद ।
नजर रोखून ।।

करता थोडी हालचाल ।
म्हणती पळून जाईल ।
कोण मज सोडविल ।
ह्या संमोहनातून ।।

संमोहनाचे ऐसे आवरण ।
जीवासी टाकी आच्छादून ।
परमसत्य गेले झाकून ।
वेदनामय आयुष्य ।।

अंधार दाटला घनदाट ।
अवघड सुटकेचा घाट ।
कोण दाखविल वाट ।
चिंतित निर्वाणी ।।

म्हणून प्रभुनामाची कळ ।
भावे दाबावी नित्यकाळ ।
साधावे क्षेमकुशल सकळ ।
कामक्रोध नासोनि ।।

नित्य अनित्य विवेक ।
वैराग्य पत्करावे सम्यक ।
बाणवावे शमदमादि षटक ।
आणिक मुमुक्षुत्व ।।

सहज साधण्यास मुक्ती ।
वरील चतु:साधनांची युक्ती ।
होता सम्यकज्ञान आणि भक्ती ।
परमवस्तु भेटेल ।।

[social_warfare]